Պայքարը մտել է նոր փուլ: Հարկավոր է ձևավորել քաղաքական հարթակ Գագիկ Եղիազարյան

Մեր պայքարը մտել է նոր փուլ, այդ պատճառով պետք է ձեռքբերումները նկատի ունենալով հանդերձ, ձեւակերպենք հաջորդ փուլի խնդիրը եւ շարժվենք առաջ:

ՀԷՑ-ի հետ կապված պատմությունը բացահայտեց, որ խնդիրը 7 դրամի մեջ չէ: Մենք տեսանք, որ Հայաստանի էներգետիկ համակարգում տիրող ամենաթողության եւ անպատասխանատվության մթնոլորտում տեղի ունեցած թալանի հետեւանքով փլուզման շեմին է հայտնվել ոչ միայն այդ համակարգը, այլեւ երկրի ամբողջ տնտեսությունը:

Բացահայտվեց նաեւ, որ այս ամենի համար մեղավոր են թե ՀԷՑ-ը կառավարող օտար ընկերությունը, թե ոլորտի կարգավորումը եւ վերահսկողությունն իրականացնող հայաստանյան մարմինները: Խոսքը վերաբերում է ոչ միայն հանրային ծառայությունները կարգավորող մարմիններին, այլեւ առաջին հերթին, երկրի քաղաքական ղեկավարությանը:

Երկրի կյանքում ռազմավարական նշանակություն ունենալու պատճառով էներգետիկայի ոլորտը պետք է լիներ նրա ղեկավարության ուշադրության կենտրոնում:

Մինչդեռ տարիներ շարունակ ոլորտը ոչ միայն բարձիթողի վիճակում է եղել, այլեւ կառավարող քրեական օլիգարխիան եւ ՀԷՑ-ի օտար կառավարիչները հանցավոր համաձայնությամբ իրար մեջ են բաժանել համակարգի թալանի արդյունքները:

Ստեղծված վիճակում միայն տնտեսական հարթությունում հնարավոր չէ լուծել այս խնդիրը: Եթե չլինեն քաղաքական պատասխանատվություն եւ երաշխիքներ, նույն թալանը կշարունակվի, իսկ այդ ընթացքում էներգետիկ համակարգը կարող է խափանվել եւ անգամ փլուզվել:

Մեր ժողովուրդը այս ամենը գիտակցում է, ուստի մարդիկ իրականում հրապարակ ու փողոց են գալիս քաղաքական փոփոխության տենչով եւ ամեն վայրկյան սպասում են երկիրն աղետի հասցրած ռեժիմին հեռացնելու կոչերին ու գործողություններին:

Երիտասարդների նախաձեռնությամբ եւ մեր ժողովրդի մասնակցությամբ առաջացած այս շարժումը կարիք ունի ընդարձակվելու եւ քաղաքական խորություն ձեռք բերելու:

Դա հնարավոր է կազմակերպել շարժման հենքի վրա առողջ ուժերին եւ անհատներին համախմբող քաղաքական հարթակ ձեւավորելով եւ դրա միջոցով պայքարը կազմակերպված ու հետեւողական դարձնելով:

Այդ հարթակը հնարավոր է ձեւավորել չվարկաբեկված քաղաքական եւ հասարակական գործիչներին, քաղաքագետներին, ինչպես նաեւ քաղաքական ասելիք ունեցող երիտասարդներին բեմ տրամադրելու եւ քննարկումներ կազմակերպելու միջոցով:

Այսպիսի հարթակը հնարավորություն կտա հաղթահարելու ներքաղաքական պառակտումը, ձեւակերպելու երկրին այս վիճակից հանելու քաղաքական պահանջներ եւ օրակարգ:

Ուստի դիմում ենք քաղաքական պատասխանատվություն ստանձնելու ունակ բոլոր ուժերին ու անհատներին եւ հրավիրում ենք մասնակցելու այս գործընթացին:

ՈՉ ԹԱԼԱՆՉԻՆԵՐԻՆ

Share Button