«Սա Հայաստան է և վերջ» կոմիտեի հայտարարությունը

«Սա Հայաստան է և վերջ» կոմիտեն, որը միավորում է արցախյան քաղաքական և հասարակական գործիչների, սահմանային վերջին միջադեպերի վերաբերյալ հայտարարություն է տարածել: Այնտեղ մասնավորապես նշվում է.

«Սիրելի՛ հայրենակիցներ

Նորից սրվել է իրավիճակը հայ-ադրբեջանական շփման գծի ամբողջ երկայնքով:

Ցավոք, դրա հետեւանքով ունեցանք նաեւ զոհեր:

Միեւնույն ժամանակ՝ թուրքը նորից տեսավ մեր ոգու եւ բազկի ուժը:

Ադրբեջանը հասկացավ, որ 1994-ին իր իսկ խնդրանքով կնքված զինադադարի պայմանագիրը խախտելու դեպքում կարող է կրկին տարածքներ կորցնել:

Իսկ սահմանի ամբողջ երկայնքով խրամատում կանգնած հայ զինվորների կողքին Արցախյան գոյամարտի վետերանների հայտնվելը եւ համատեղ մարտական հերթապահությունը ապացուցեցին, որ հայ ժողովուրդը միասնական է եւ տեր ու պաշտպան է իր Հայրենիքին: Իր հերթին՝ դիրքում կանգնած հայ զինվորն իր ուսին զգաց ավագ սերնդի եւ ամբողջ ժողովրդի գնահատանքը, աջակցությունն ու խրախուսանքը:

Թշնամին հաշվարկել էր, որ մեր երկրում առաջացած ճգնաժամային իրավիճակը, այդ թվում՝ անարդարությունը, արտագաղթը, աղքատությունը եւ գործազրկությունը պարարտ հող է ստեղծել մեզ վրա ռազմական ճնշումներ գործադրելու միջոցով իր նպատակներին հասնելու համար:

Սակայն նրա հաշվարկները սխալ դուրս եկան: Մեր ժողովուրդը մեկ անգամ եւս ապացուցեց, որ չնայած բոլոր դժվարություններին, անհրաժեշտ պահին ունակ է վերակազմավորվելու եւ լուծելու ազգի ու պետության առջեւ ծառացած ճակատագրական խնդիրները:

Սիրելի՛ հայրենակիցներ: Մենք պարտավոր ենք նույն միասնականությամբ հաղթահարել նաեւ մեր երկրում առաջացած ճգնաժամը՝ սահմանելով արդարություն, կասեցնելով արտագաղթը, ի վերջո՝ ստեղծելով հզոր եւ ազգային պետություն»:

Կոչը ստորագրել են կոմիտեի ներքոնշյալ անդամները՝

Քերոբ  Ղազարյան
Վահան Բադասյան
Գրիշա Հայրապետյան
Արթուր Խաչատրյան
Ադելա  Աղաջանյան
Տիգրան  Կյուրեղյան
Մխիթար Ավետիսյան:

– See more at: http://artsakhnews.am/?p=1060#sthash.4z7E9XGM.dpuf