«Այն ուժերը, որոնք Սերժ Սարգսյանին նշանակել են ադմինիստրատոր, պատրաստվում են նրան փոխարինել մեկ ուրիշով». Ժիրայր Սեֆիլյան

PressIdent.am-ի զրուցակիցն է «Սարդարապատ» շարժման համակարգող և Նախախորհրդարանի քարտուղարության համակարգող, Շուշիի առանձնակի գումարտակի հրամանատար Ժիրայր Սեֆիլյանը: Սեֆիլյանի հետ խոսել ենք իրեն ուղղված ԱԱԾ-ի սպառնալիքի, Նախախորհրդարանի հետագա անելիքների, երկրի ներկա վիճակի և այլնի մասին:

– Պարո´ն Սէֆիլյան, օրերս Նախախորհրդարանը հայտարարություն էր տարածել Ազգային անվտանգության ծառայության բարձրաստիճան պաշտոնյայի կողմից Ձեզ ուղղված սպառնալիքի մասին: Թեև ԱԱԾ պաշտոնյան դա կապել է Քեսաբում կատարվող իրադարձությունների հետ, այնուամենայնիվ, կարծում ենք, որ Ձեզ արտաքսելու համար իրական պատճառները շատ ավելի խորն են և հին: Այդպես չէ՞:

– Առայժմ շատ չեմ խորանա, միայն կավելացնեմ, որ կատարվածը ընդունում եմ որպես իմ գործունեության հետ կապված սպառնալիք: Միաժամանակ կարող եմ ասել, որ այդ սպառնալիքը, ում կողմից արվել է` հուսահատական քայլ է հիշեցնում. ռեժիմը հոգեվարքի մեջ է ու եթե այն ուժեղ լիներ, այսպիսի բաների մասին չէին մտածի: Այս որոշումն անարդյունավետ է ու եթե որոշեն խոսքից գործի անցնել, ապա դրանով ոչինչ չի կանխվելու: Եթե ինձ դռնից են դուրս հանում, ես պատրաստ եմ լուսամուտից մտնել: Նման հարվածները մեզ միայն ուժեղացնում են:

 – Մեր երկրում արդարությունը վերականգնելու, իշխանությունը իրական տիրոջը՝ ժողովրդին վերադարձնելու առաջամարտիկներից եք եղել, ինչի պատճառով մշտապես հետապնդել են Ձեզ, ազատազրկել: Այս ընթացքում մեր երկրում իրավիճակի փոփոխություն չի եղել, հետևաբար՝ շարունակում եք մնալ ռեժիմի եթե ոչ թշնամին, ապա՝ հակառակորդը: Ձեր կարծիքով, իշխանությունը շարունակո՞ւմ է ի դեմս Ձեզ իրական վտանգ զգալ:

– Բնականաբար: Չեմ կարծում, թե ռեժիմն այնքան պարապ ժամանակ ունի, որ գնդապետներին զբաղեցնի այդ գործով: Սպառնալիքը փոխանցողը գնդապետ է, ում անունը մենք գիտենք, բայց դեռևս չենք ցանկանում հրապարակել:

– Հրանուշ Հակոբյանը մեր սփյուռքահայ հայրենակիցներին անընդհատ տուն է կանչում՝ Հայրենիքը շենացնելու: Դուք՝ որպես Սփյուռքի ներկայացուցիչ, ով Հայրենիքի ծանր ու դժվար օրերին մենակ չթողեց նրան, կյանքը վտանգեց պատերազմի դաշտում, այսօր զրկված եք Հայաստանի քաղաքացի լինելու կարգավիճակից: Ի՞նչ եք կարծում, Սփյուռքը կարողանում է զատել իրականը կեղծիքից:

– Շատ կարևոր է Հայաստանում տիրող իրավիճակի վերաբերյալ ճշգրիտ գնահատականներ տալը: Հենց այնպես չենք ասում, որ մեր երկիրն օկուպացված է, որ գտնվում ենք նոր գաղութատիրական իրավիճակում: Ձեր մատնանշած անունը հուշում է, որ մենք գտնվում ենք նոր գաղութատիրական վիճակում: Բոլորս գիտենք, թե ով է եղել Հրանուշ Հակոբյանը: Եթե թերթենք վերջին 25-30 տարվա պատմությունը, կտեսնենք, որ նա եղել է Խորհրդային Հայաստանի Կոմերիտական կազմակերպության քարտուղարը: Բոլորս գիտենք, որ լայն իմաստով այդպիսի պաշտոնները հատուկ ծառայությունների` ԿԳԲ-ի, համակարգին են պատկանել: Այսօրվա կարևորագույն պաշտոններ զբաղեցնող անձանց առյուծի բաժինը եղել են ԿԳԲ-ի համակարգում: Մինչև այս հանգամանքը հայությունը չգիտակցի, անկախ պետություն չենք կարող ստեղծել: Այստեղ ինձ քաղաքացիություն տալ-չտալու երևույթը ևս օգնում է բացատրելու հայությանը, թե ինչպիսի ռեժիմում ենք մենք գտնվում: Կարծում եմ` մեզ շուտով կհաջողվի այդ ճիվաղային համակարգից ազատվել:

 – Այսինքն՝ Հրանուշ Հակոբյա՞նն էլ է գործակալ:

– Անշուշտ:

 – Նախախորհրդարանը, որի համակարգող եք նաև Դուք, զուգահեռ կառավարություն է ձևավորում` իր դատական, օրենսդիր, գործադիր մարմիններով: 2013թ. նախագահի ընտրություններից հետո դե ֆակտո հաղթած թեկնածու Րաֆֆի Հովհաննիսյանն էլ նախագահի երդմնակալության օրը զուգահեռ երդմնակալություն անցկացրեց Ազատության հրապարակում: Հետևանքների մասին տեղյակ ենք բոլորս, սակայն, ըստ Ձեզ՝ հասարակությունն այսօր ունի՞ վստահության այն պաշարը, որ հավատա նոր ձևավորված քաղաքական թիմին, որ գիտակցի զուգահեռ կառավարության անելիքների զորությունը:

– Րաֆֆին չարեց այն, ինչ մենք ենք առաջարկում: Երբ նա հանդիպեց Սերժ Սարգսյանի հետ,  Սարգսյանը նրան երեք ուղի ցույց տվեց. առաջին` դառնալ ընդդիմության լոկոմոտիվը և մասնակից դառնալ երկրի կառավարմանը, երկրորդ` միանալ կոալիցիային և երրորդ`  ստեղծել զուգահեռ իշխանություն՝ միաժամանակ զգուշացնելով, որ այս դեպքում նրանով կզբաղվեն համապատասխան մարմինները: Մենք Րաֆֆուն բազմիցս հուշել ենք, որ ճիշտ ուղին երրորդն է: Ու Սերժն իրականում ևս հուշեց, որ ճիշտ ուղին երրորդն է: Դժբախտաբար,  Րաֆֆին դա չկիրառեց:

 – Ըստ Ձեզ՝ ինչու Րաֆֆի Հովհաննիսյանը չօգտագործեց ճիշտ ուղին կամ ընդհանրապես հրաժարվեց Սարգսյանի նշած երեք տարբերակներից էլ:

– Թե ինչ պատճառներով` այժմ չեմ կարևորում: Մեր գործը դժվարացել է, բայց մենք վստահ ենք, որ մեզ հաջողվելու է մեր ժողովրդի սիրտը գրավել: Պարզ է, որ հուսահատական վիճակը գերիշխում է, սակայն մենք համոզված ենք, որ մեր ճանապարհային քարտեզի ընթացքով, մեր համառ գործունեությամբ կարողանալու ենք ոչ միայն ձևավորել զուգահեռ իշխանության սաղմեր, այլև մոբիլիզացնել ժողովրդին:

 – Ինչպես Դուք եք ասում (նկատի ունեմ Նախախորհրդարանը) ժամանակի հետհաշվարկն սկսված է, և ռեժիմին հաշված ամիսներ և օրեր են մնացել: Սա փոքր-ինչ հավակնոտ չի՞ հնչում, Դուք կկարողանա՞ք այդ ժամանակահատվածում՝ մինչև Ցեղասպանության 100-ամյա տարելիցը, այնքան մոբիլիզացնել հասարակությանը, քաղաքական ուժերին, որ իշխանական բուրգի կործանումը մեկընդմիշտ հաջողվի:

– Մենք միակ քաղաքական ուժն ենք, որ տաբերվում ենք մյուսներից նաև այն իմաստով, որ մյուսները, դժբախտաբար, պատրաստվում են 2017-18 թվականին նոր միայն իշխանափոխություն անել: Իսկ մենք ասում ենք, որ ժամանակ չունենք: Եվ սա սոսկ կամայականություն չէ. մենք հստակ հաշվարկների միջոցով ենք հասել այս որոշմանը: Մենք հասկանում ենք, որ կա մի եզրագիծ, կա մի վերջնագիծ, որից այն կողմ մեզ չի հաջողվի պետություն ստեղծել: Հեղափոխել ասելով՝ մենք չենք ասում միայն ռեժիմից ձերբազատվել: Մենք այն ժամանակ կհամարենք, որ հասել ենք հաջողության, երբ ռեժիմից ձերբազատվելուց հետո կարողանանք երկիրը զարգացման ճիշտ ուղու վրա դնել: Եթե մենք վստահ չլինեինք մեր հաջողության մեջ, այս կռվի մեջ չէինք մտնի:

 – Մեր երկրի հրամայականներից մեկն էլ արտահերթ ընտրություններն են: Եթե վաղն ևեթ արտահերթ ընտրություններ լինեն՝ Դուք ում եք տեսնում որպես հաջորդ նախագահ:

– Ես ինձ նախագահի պաշտոնում չեմ պատկերացնում, ես ինձ պատկերացնում եմ երկրում փոփոխություններ իրականացնող առաջնորդի պաշտոնում: Մեր շարժումը ունի իր նախագահի թեկնածուն, որի անունն առայժմ չեմ ցանկանում ասել:

 – Օրերս Աստանայում կայացած Եվրասիական տնտեսական միության բարձրագույն խորհրդի նիստի ժամանակ Ղազախստանի նախագահ Նուրսուլթան Նազարբաևը,  կարդալով Ադրբեջանի նախագահ Հեյդար Ալիևի նամակը, տհաճ անակնկալի բերեց Սերժ Սարգսյանին: Ինչպե՞ս եք վերաբերում Նազարբաևի այդ արարքին և, ըստ Ձեզ, Սերժ Սարգսյանը պե՞տք է հակադարձ պատասխան տար քաղաքական այդ անակնկալ քայլին:

– Ինձ համար զարմանալի չեն այդ երևույթները, որոնք մեր երկրին վնաս են հասցնում: Ես երբեք չեմ խոսում, թե Սերժ Սարգսյանը ինչպես պետք է վարվեր, որովհետև ես և մենք Սերժ Սարգսյանին չենք համարում մեր երկրի նախագահ, ուստի նրանից ոչինչ չենք ակնկալում: Մենք այսօր չունենք արտաքին քաղաքականություն, մեր երկիրն այսօր ղեկավարվում է դրսից:

 – Ալիևի նամակով ասվում էր, որ Հայաստանը Եվրասիական տնտեսական միություն կարող է մտնել ներկայիս սահմաններով՝ առանց ԼՂՀ-ի: Անգամ հայաստանյան իշխանության տարբեր ներկայացուցիչներ՝ լինելով միևնույն թիմի անդամ, տարբեր հայտարարություններ ու պնդումներ արեցին այս առնչությամբ: Անձամբ Դուք ինչպե՞ս եք վերաբերում Ալիևի այս հայտարարությանը:

– Բնականաբար, դեմ ենք: Ալիևները նոր չէ, որ նման մտքեր են հայտնել: Նրանք իրենց ուղին ունեն, մենք` մեր: Արցախյան խնդիրը մեզ համար արդեն լուծված է. հայերին հաջողվել է ռազմի դաշտում ճնշել հակառակորդին: Դժբախտաբար, դիվանագիտական դաշտում այս 20 տարիների ընթացքում մենք տանուլ ենք տվել:

 – Դա միանգամայն հասկանալի է: Այնուամենայնիվ, ԼՂՀ-ն Հայաստանի հետ պե՞տք է միանա Եվրասիական տնտեսական միությանը, թե՞ ոչ: Հայաստանի և ԼՂՀ-ի միջև մաքսակետ դնելու առնչությամբ ՀՀԿ-ականների իրարամերժ հայտարարությունները հասարակությանը մոլորեցնելու ձև ե՞ն՝ շեղելու բուն խնդրից:

– Չենք ուզում ավելորդ նրբությունների մեջ խորանալ, թե մաքսակետը որ մասում է լինելու, թե Արցախը ինչպես են տարանջատելու ՀՀ-ից և այլն: Մենք ասում ենք, որ առհասարակ դեմ ենք, որ Հայաստանը անդամագրվի որևէ վերպետական կազմակերպության: Մենք նկատի ունենք ոչ միայն ՄՄ-ին և Եվրասիական միությանը, այլև` Եվրոպական միությանը: Եթե գոյություն ունի և՛… և՛, կա՛մ… կա՛մ, ապա մենք ասում ենք` ո՛չ… ո՛չ: Մեր նման մոտեցման պատճառները բազմաթիվ են: Առաջինը` եթե այսօրվա մեր վիճակով փորձենք մտնել որևէ վերպետական կազմակերպության մեջ, տարրալուծվելու ենք: Իսկ այն հանգամանքը, թե իշխանության տարբեր անդամներ տարակարծիք են այս հարցի վերաբերյալ, խոսում է ոչ թե այն մասին, որ նրանք ուզում են մոլորեցնել մեզ, այլ պարզապես վկայում է այն մասին, որ այս համակարգը հոգեվարքի մեջ է. աջ ձեռքը չի իմանում, թե ձախն ինչ է անում, ձախը չի իմանում, թե աջն ինչ է անում: Սերժ Սարգսյանն արդեն չի տիրապետում իրավիճակին: Ուստի այն ուժերը, որոնք Սերժ Սարգսյանին նշանակել են ադմինիստրատոր,  պատրաստվում են նրան փոխարինել մեկ ուրիշով: Թավշյա իշխանափոխության հոտ  է գալիս: Սակայն այդ տարբերակը ոչ մի լուծում չի բերելու մեզ:

 

Քրիստինե Պողոսյան

Աղբյուրը՝ www.pressident.am