Պատրաստ են աջակցել ամեն տեսակ ընդվզման

Չնայած իրենց ընդդիմադիր հայտարարած հայաստանյան տարբեր ուժեր տարբեր պատկերացումներ ունեն իշխանափոխության, ժողովրդին հրապարակ բերելու, հրապարակ բերելուց հետո իրականացվելիք քայլերի մասին, և ամեն մեկն էլ առաջնորդվում է իր պատկերացումներով, կյանքը ցույց տվեց, որ նրանք առանձին-առանձին հրապարակ են կարողանում հանել միայն իրենց համախոհներին: Ոչ ավելին:
Անցյալ տարվա ընթացքում, ի թիվս այլ քաղաքական ուժերի, մի շարք նախաձեռնություններով հանդես եկավ նաև «Նախախորհդարանը», որը պահանջում է ոչ թե սոսկ իշխանափոխություն, այլ` համակարգափոխություն:
Մասնակցելո՞ւ է «Նախախորհրդարանը» հունվարի 18-ին կայանալիք հանրահավաքին, որն ուղղված է ընդդեմ կենսաթոշակային կուտակային համակարգի ներդրման:
«Նախախորհրդարանի» համակարգող Գարեգին Չուգասզյանը irates.am-ի հետ զրույցում տեղեկացրեց, որ իրենք մասնակցելու են, քանի որ ամեն տեսակ ընդվզում պետք է ստանա իրենց աջակցությունը:
«Սա ժողովրդի արթնեցման ձև է»,- մեր զրույցում ասաց նա: Գարեգին Չուգասզյանը նշեց, որ իրենց նպատակը մնում է նույնը` համակարգափոխությունը, իսկ արդյունքները կգումարվեն կաթիլ-կաթիլ: Կարևւորը, ըստ նրա, շարժում ձևավորելն է:

Թագուհի ՀԱԿՈԲՅԱՆ

Աղբյուրը` irates.am