Փաստ է, որ գնալով մոտենում ենք կրիտիկական պահին. Ժիրայր Սեֆիլյան

Հայ-ռուսական «գազային» համաձայնագրերի հարցում ՀՀ իշխանությունների դիրքորոշումը Նախախորհրդարանի անդամ, Շուշիի առանձնակի գումարտակի հրամանատար Ժիրայր Սեֆիլյանի համար զարմանալի չէ:

 

«Այս իշխանությունները պատրաստ են ամեն ինչ վաճառելու հանուն իրենց իշխանությունը, աթոռը պահպանելուն: Անշուշտ, որքան գնում են առաջ, այնքան ավելի է խորանում մեր երկրի նույնիսկ դե յուրե անկախության ոչնչացման հարցը»,-Tert.am-ի հետ զրույցում ասաց նա՝ մեկնաբանելով նախօրեին Ազգային ժողովում ՀՀ-ՌԴ մի քանի համաձայնագրերի շուրջ տեղի ունեցած քննարկումը և դրանց նկատմամբ իշխանությունների՝ միանշանակ կողմ դիրքորոշումը:

 

Շուշիի առանձնակի գումարտակի հրամանատար խոսքով, սակայն, իրենք խուճապի չեն մատնվում այն իմաստով, որ բոլոր պայմանավորվածությունները, որոնք այսօր իշխանությունները փորձում են ձեռք բերել այլ երկրների հետ, իրենք ի չիք են դարձնելու և ստեղծելու են ազգային պետություն:

 

Անդրադառնալով Նախախորհրդարանի նախաձեռնած Նոր Հայաստանի ստեղծման պայքարին, Ժիրայր Սեֆիլյանը նշեց, որ պարբերաբար նոր մարդկանց է տեսնում իրենց շարքերում: «Համոզված եմ, որ գնալով մեր շարքերը մեծանալու են. այսպիսի տրամաբանությամբ պայքարն իմաստավոր է, և 2014թ.-ին մեզ կհաջողվի հիմնադիր խորհրդարան հիմնելու մեր խնդիրը հնարավորինս շուտ կյանքի կոչել: Դրանից հետո արդեն շատ ավելի հեշտ կլինի որևէ ֆորսմաժորային իրավիճակում պատշաճ հակազդեցություն տալու»,-ասաց նա՝ ավելացնելով, որ առայժմ ժողովուրդն իրազեկված չէ իրենց ծրագրից և իրենք առաջինը կփորձեն դա անել:

 

Ավելի վաղ Նախախորհրդարանը տարածել էր հայտարարություն, որում ասվում էր, որ Հայաստանում ինքնիշխան հայ ժողովրդի կամքի վերահաստատումից հետո համապատասխանաբար դադարեցվելու կամ չեղյալ են հայտարարվելու «գործող վարչախմբի, ինչպես նաև նրա նախորդների կնքած այն միջազգային պայմանագրերը, որոնք հակասում են ազգային շահերին»:
«Ժողովրդից գողացածը վերադարձնելու ենք ժողովրդին: Խուճապի պետք չէ մատնվել, բայց որ գնալով մենք մոտենում ենք կրիտիկական պահին, դա փաստ է»,-ասաց Ժիրայր Սեֆիլյանը:

 

Հիշեցնենք, որ նախօրեին ԱԺ արտահերթ նիստում քննարկվեցին «Հայաստանի Հանրապետության կառավարության և Ռուսաստանի Դաշնության կառավարության միջև «ՀայՌուսգազարդ» փակ բաժնետիրական ընկերության բաժնետոմսերի առքուվաճառքի և հետագա գործունեության պայմանների մասին» համաձայնագիրը և ևս 2 համաձայնագրեր, որոնք պետք է վավերացվեին: Քննարկումներն անցան բուռն մթնոլորտում:
ԱԺ «Ժառանգություն» խմբակցության պատգամավոր Ալեքսանդր Արզումանյանը համաձայնագրերն անվանեց ապտակ Ազգային ժողովին և սպառնալիք հայոց պետականությանը։ ԱԺ «Բարգավաճ Հայաստան» խմբակցության քարտուղար Նաիրա Զոհրաբյանն էլ հայտարարեց, որ Կառավարությանը քրեական պատասխանատվություն է սպասվում:

 

Եզրափակիչ ելույթներին ոչ իշխանական բոլոր խմբակցությունները հայտարարեցին, որհամաձայնագրերին ամոթալի են և հակասում են Հայաստանի շահերին։

ԱԺ փոխնախագահ Էդուարդ Շարմազանովը քննարկումն անվանեց «ռուսական վեչե, որտեղ ճշմարիտը նա է, ով ավելի բարձր է խոսում, ոչ թե նա, ով եղելությունն է ներկայացնում»։
Այնուհանդերձ դեկտեմբերի 20-ին կայացած ՀՀ-ի ու ՌԴ-ի միջև «գազային համաձայնագրի» վավերացման քվեարկությունը հետաձգվեց. ՀՀԿ-ական պատգամավորների թիվը բավարար չէր:

Աղբյուրը` tert.am